/var/www/lamiatrieste.com/wp-content/themes/lamiatrieste/content.php

Roiano

Ogni rion de Trieste ga le sue proprie carateristiche. Roian xe come Giano bifronte.
Nel giro de pochisimo spazio se pasa da un centro pien de case, negozi, auti, niente parchegi, la sede de la Polizia Stradal che solo a fine 2015 xè  stada trasferida a Valmaura dopo ani e ani de discusioni e po’ discusioni su come valorizar a fini sociali quel spazio, un suo centro ideale con la ciesa, la Stock o meio la ex Stock con la sua storia dove che adeso se va per discuter de tasse, el viale Miramar che lambisi o anzi proprio toca Roian … eco che se pasa da questo logo indafarà e caotico a paesagi e stradine de montagna, strete, piene de curve, che tira forte in su, verde, tanto verde, vigne, tante vigne e casete sparse qua e là con solo qualche picio aglomerato e subito questa ecezion de 4 case insieme ciapa un nome come che fosi un paese.
Eco che gavemo Piscianzi che se scrivi anche Pis’cianzi e scrito cusì xe più intuitiva la pronuncia de questo nome e po’ Laijnari.
Stradine che in poco arriva a Conconello che de l’alto se fa ben veder con le sagome bianche e rose dele sue potenti antene.
Ripide salite come Scala Santa, vicolo delle Rose, via dei Moreri, via Sottomonte.
Giano bifronte anche nella lingua, quela perlopiù italiana zo’ in Roian city e quela perlopiù slovena su come che su fosi za carso ben inoltrà.
Zo’ dei monti scendi vari torenti. Quatro, tuti ben soterai e che i sta boni anche quando che piovi tanto. Gran fortuna – disi i genovesi.
Basta saver far le robe ben – rispondi i triestini. I se zonta insieme vizin la ciesa – la cui piaza se ciama apunto “Tra i rivi” – e insieme come boni fradei i va in mar che una volta iera ben vizin e po’ xe sta imbunì quel toco per far posto prima al Lazareto fato far da Maria Teresa, po’ a un arsenal de navi e infine a binari del treno e la strada.

La mia Trieste, 30 Gennaio 2016