Una via importante, ma che no la se la tira.
La fa el suo lavor de colegar Prosecco e la parte ovest del Carso (Santa Croce, Sgonico, Gabrovizza, Sales, Rupinpiccolo) con la città e el suo centro. Una via utile, ma senza fronzoli come le sue oneste case.  A metà, un attimo de respiro con una piazzetta o meio saria dir un slargo, el slargo Belvedere.
Cosa che ghe sia de belvèder no se sa, ma poco importa.
Case standard de qua e de là con solo poche case nove – diria più anonime delle vecie – come el palazo de l’Inps e po el novo garas in piazzeta Belvedere dove xe l’edicola.
Qualche casa in completo abbandono (n. civici 67 e 69) tacade alla casa più rafinada e nobile della via, quella del n 71. Un bel contrasto.
Nelle foto se vedi ben.

Da tenir presente la lapide sulla casa del civico 25 che ricorda dove che ga vissù de picio Guglielmo Oberdan.
Negozi pochi sia oggi che 50 anni fa. Qual via grande de Trieste no la xe piena de negozi che fa bela mostra de sè? Via Udine, anche in questo, mostra la sua modestia e el comercio xe concentrà in piazeta e in 2 isolati proprio al’inizio.
Poco prima de la piazeta un rigatier – vecio stampo – pien dentro de mile robe de tuti i generi. Là el xe da 30 anni. Chi diria de quel posto salvo quando che el impinisi el marciapiede con robe vecie de vender?
(A proposito de “robe vecie de vender” Come che go scritto ste parole me se vignù in amente del quel straziariol che girava per le strade nei anni ’50 e el zigava “straze robe vecie de vender” e el vardava in su spetando che qualchedun de una finestra ghe disessi de andar su. Iera anni che pochi de lori dava via robe vecie e tutti tigniva tutto. Pensa oggi un mato cussì. El doveria girar con un Tir per le strade tanta roba la gente ghe daria, anche senza domandar soldi ma basta che el porti via. Tempi che passa.
Tornando a noi.
Dopo el campo Belvedere andando verso fora una vera chicca: un liutaio, me par l’unico de Trieste, che ripara e anche fa novi strumenti. Dentro Andrea simpatico, giovane e … foresto del sud.
Poco prima del liutaio, al n. 43, una casa de abitazion. Ma a suo tempo la iera un casin, sì insoma, un bordel o casa de toleranza o casa chiusa o come che te la vol ciamar. Una delle poche assieme a quella de via Bonomo fora de la zona de Cavana. E pò, dopo la fine dei casini, iera dispensario antitubercolosi e pò per anni in semi abbandono prima de diventar casa de apartamenti. Xe la casa che un se trova di fronte quando che se sali in via Udine da via Tasso.

Verso l’inizio della via quasi di fronte l’Inps el verde de un per de alberi sporgi un poco sula via. Poco se li nota o almeno mi li go sempre visti, ma senza vederli. Solo adeso go zercà de capir e son entrà in quel che xè el giardin del retro del palazo Economo della Sopraintendenza alle Belle Arti che dà su piaza Libertà. El portonzin de fero ruzine che dà su la via Udine no se verzi ma se pol entrar da la via laterale, la via Tivarnella.
Un giardin in stato de abandono che incuti come un senso de tristeza per essere là inutile e no visto da nissun. Forse lui sa de questa sua condizion e da ciò la sua tristeza.
Anche el drio del Tartini ga un spazio libero, ma no giardin, salvo qualche albereto. Come che se svolta da via Santi Martiri per imbocar la via Udine, subito sula sinistra.
Un ricordo personale … al n. 32 della via una straordinaria persona, il prof. Frassinelli che mio nonno gaveva sopranominà “Torricelli” perchè prima el stava in una casa con una specie de torre (casa dell’osteria Cavallerizza in via Rossetti angolo via Eremo). Gambe stagne me portava in pochi secondi su su fin quasi al teto. Una piccola stanza sototeto piena de libri impilai per terra dove lui dava ripetizion ai muli senza voia de studiar o duri de comprendonio. Insoma el caso mio.
Tanta pazienza e tanta umanità. Un uomo che, per quei tempi, iera zà de altri tempi.
Via Udine, strada che la comincia quasi in piazza Oberdan – dunque centro – e la finisi a Roian costegiando la Stock prima de diventar altra e ciamarse Salita di Gretta.
Auti che va, auti che vien. Ma tutti con disciplina e mai lassai con le doppie freccie a ingorgar el traffico.
Via Udine, via dignitosa, utile e ordinata.